**بعض اقوى انواع التوربو**

[العصيمي]

:السلام عليكم الجميع

هاذا موضوع عن بعض اقوى التوربوات من اقوى الشركات . وطبعا للتزويد القوي سواء للدراج او سباقات قوية .


HKS t51r طبعا هل التوربو يعتبر عرش التوربوات لشركة اج كي اس وله عدة اصدارات اس بي ال بي بي والكاي والــخ عموما
وهو بالحجم اكبر بشوي عن التي 66 لاكن له اجزوز هوزنق اكبر عن التي 66 بوايد ويطلع تقريبا من ال800 حصان وفوق ويعتبر سعره غالي جدا تقريبا 12 الف درهم اماراتي . واللاق فيه ملحوظ وكبير لاكن كل شي وله حل واللي يطمع بالمشي يتحمل اللاق بغيت مشي لازم شوي لاق وتقريبا التوربو يطلع قوته من ار بي ام 4600 طبعا حسب المحرك والتزويد وشغلك والاغراض لي على الموتر .


-----------------------------------------------------------------------------


HKS GT2835

هل التوربو في الغالب واكثر الاحيان الجماعة يركبونه على اساس تونات توربو سواء دراج او ستريت ريسنق وهن كبار بالحجم تقريبا حجمهن اصغر بشوي عن الTS04 اللي معروف من اقوى التوربوات بالعالم طبعا اغلب واكثر الاحيان يكون هل الاجزوز هوزنق للتوربو 0.70 لاكن في ناس تطلب هوزنق اصغر عشان عشان اللاق يخف وفتحتهن تكون اسرع واحسن وطبعا لك الحق انك تطلب من الشركة هوزنق اصغر وبراي انا احسن لان .70 على تونات كبار بيكون فيهن لاق .على العموم على اجزوز هوزنق .70 هل التونات يطلعن قوتهن على ار بي ام 5000 الا لو صغرت الهوزنق بيفتحن شوي قبل. قوتهن توصل الى ال800 حصان .



--------------------------------------------------------------------------------

التوربو نتكس تي 70 وال72 وال76

هل التوربوات تقريبا احجامهم نفس ال66 بس المروحة تكون اكبر وال70 اقرب لل66 بس المروحة اكبر شوي وال72 اكبر اكثر وال76 اكبرهن ويعتبر الاقوى مبينهم ال70 يطلع تقريبا ال600 حصان اذا شديت عليه
وال72 مروحته لانها اكبر والكمبريسر مقوى اكثر عن 70 فيطلع طبيعي قوة اكبر لين ال750 حصان وجربناه على فتك كان مشيه حلو بس عيبه فيه لاق شوي كان الفل بوست ماله على الفتك على ار بي ام 4700 تقريبا بس مشيه فنان
نروح للتي 76 يعتبر اقواهم ويطلع قوة جبارة تتراوح الى 800 حصان+ لاكن اللاق اللي فيه يخليه يفتح فل بوست على ار بي ام 5800 تقريبا . وفي النهاية كله ينحسب على المكينة والاغراض لي على المكينة . بس اللي يدور استعمال يومي وقوة فنانة يروح للنتك 70 وخاصة ستيشنات وفتكات.

[IMG]http://rds.yahoo.com/S=96062883/K=Turbonetics+t76/v=2/SID=w/TID=I056_77/l=IVS/SIG=12tp8e7rm/EXP=1131674433/*-http%3A//www.skylinepower.com/skylinepower.com_gtuned_r33_gtr_vspec_t76.jpg[/IMG]


-------------------------------------------------------------------



جريدي الت78 والتي 88

هل التوربوات مصنوعة من شركة المتسبيشي بمواصفات ومساعدة شركة الجريدي التي 78 الاجزوز هوزنج هو نفسه للجريدي TDo7 والكمبرسر جريدي tdo8 يعني خليط قوي على محرك قوي وتزويد فنان الفل بوست لهل التوربو تقريبا 4000 ار بي ام وفيه قوة خيالية لا يستهان بها الجميع مقلل من هل التوربو .اذا تزودت المكينة بطريقة صح وفنانة التوربو يطلع الى ال800 حصان . طبعا التي 88 الجريدي الفرق انه الاجزوز هوزنق والكمبرسر TDO8 خليط اقوى ولاكن فيه لاق اكثر وويطلع قوة جبارة جدا ويعتبر من اقوى التوربوات بالعالم اذا ماكان افضلهم . لاكن عموما هل التوربو يباله تزويد قوي عشان اطلع كل قوة التوربو من كمبيوتر وكامات والـــخ . وبعض الناس تعتبر هل التوربو غير صالح للاستعمال اليومي والبعض يشوفه عادي عني انا اشوفه ما يصلح لاقه كبير ويفتح فل بوست على ار بي ام 5200 اذا مب اكثر وحسب المكينة . والشغل . عموما التي 78 افضل من ناحية اللاق والقوة لي فيه ما تعتبر شوي ابدا.
سوبرا تي 78

------------------------------------------------------------------------------



HKS GT3037

من اقوى التونات لي نزلتها شركة اج كي اس وقوتها خيالة طبعا بكل اختصار قوتهن توصل لل1100 حصان لاكن اللاق فيه شي خيالي الفل بوست على ار بي ام 6000 !!! ويبالها السالفة تزويد صح من فوق لتحت كامات ووالات وكمبيوتر ووووووو اقنشن والـــخ وما ينصح ابدا فيه الا لمواتر الدراج .والسباقات .
الجاريت مشتركة باتفاقية مع الاج كي اس وهي تصنع لها البيس وحسب مرات مراوح او الكمبرسر او البوينت .



------------------------------------------------------------


طبعا في مشكلة بتوربوات الجريدي و الاج كي اس و عموما الشركات اليابانية .المشكلة السعر

في وايد ناس ما تقدر تشتري توربو ب12 الف درهم

طبعا الشي المضحك انها كلها نفس الشغل الفرق بالسعر الناس تتحرى الكواليتي احسن لاكن الحقيقة ان الشركات اليابانية تعاني من غلاء المعاشات وغلاء ايجار المصانع والتكلفة باليابان جدا غالية ومكلفة فمن جي مظطرين يرفعون بالسعر عشان يطلعون الفايدة .


الخلاصة ان بدال ما الواحد ياخذ توربو اج كي اس او جريدي بسعر9000 درهم او 12 الف درهم

يقدر يروح لشركة الجاريت او الاس بي ال

الجاريت من اقدم الشركات بالعالم وهي لي تصنع اغلب التوربوات لجميع الشركات وعندها مصانع من امريكا وتايلاند والـــخ واسعارها جدا حلوة وفنانة لاكن للاسف البعض في الخليج ما يدري عن هل الشي

مثال

كانت في سوبرا في دبي عليها تونات اج كي اس جي تي 3037 وسعر الواحد $2695!!!!!!!
واخترب توربو بعد فترة

فنصحنا الريال يركب توربو جاريت في البداية ماطاع وتم يعاند وقنعناه في النهاية انه يركب تونات الجاريت Garrett GT35/40R وسعر الواحد كان1,395.00!!!!! شوفو الفرق

ولما ساق الموتر بعد تركيب التونات الجاريت والله الموتر تغير مشيه الف درجة على نفس البوست اللي كان عليه قبل بتونات الاج كي اس وبلسانه قال كاني كنت اسوق دراجة 50 سي سي والحين اسوق بانشي ولين الحين التوربوات باحسن حال ماشالله .


لاحظو التكلفة والفرق الكبير بالسعر

يعني بدال ما تدفع وايد على توربو يعطيك 600 حصان تدفع اقل وتاخذ توربو يطلع 700 حصان من شركة جاريت
بس بصراحة عيب اهل الخليج انهم مع العالم واحد ركب تي 88 جريدي شباب الفريج كلهم لحقوه وركبو التي 88 ولما تقوللهم في توربو اقوى وارخص يقولك لا وما يقتنع ويقولك بانكوك ويالف .


اقوى سوبروات بالعالم عليها جاريت الGarrett GT42R / RS او الجاريت الجي تي 42 ار .

وسعرهن 1900 دولار ولو تقارنهن مع الاج كي اس التي 51 ار البول بيرنق او الجريدي الكنق 88 الار اليديد


بتلقى انك تقدر تشتري توربوين من شركة جاريت جي تي 42 يطلعن 1000 حصان بالراحة والفل بوست مالهن علىار بي ام 5800 حسب المكينة والتزويد , بسعر توربو واحد مثل جريدي 88 او ال51 ار !!!!

وعفكرة الجاريت ال42 ار يكون بول بيرنق والسوبروات مثل سوبرا بيتر في امريكا دخلت في ال9 ثواني على هل التوربو وطلعت 1120 حصان

شوفو الجراف




وفي ريال ربيعنا من بوظبي ركبناله توربو على ستيشن كان مركب تي 76 نتكس اخترب وركبناله جاريت الالجي تي 40 ار كان قبل يقبض الاي 55 شوي وعقب تروح ال55 بالخط الحين لا قومة ولا خط رايمة تلحقه ال55 وببوست اقل من ماكان عليه بالنتكس ال76!!!


والسموحة على الاطالة الجميع
واللي عنده مزيد من معلومات لا يبخل علينا يا الربع

ويا جماعة سؤال للجميع لو عندك ستيشن وتبا تسوي بروجكت عليه بس استعمال يومي ويكون مشيه قوي وبسعر معقول شو راح تختار اي توربو !!! مع ذكر السبب
وهالله هالله بالمرور 3 ساعات اكتب هل الموضوع والله