تجربتي الشخصية مع الحفة والبوردنق للاستيشن

[GeNTLy]

السلام عليكم ورحمة الله و بركاته

حبيت احط تجربتي الشخصية قبل وبعد ماسويت الحفة والبوردنق لاستيشن ستة سلندر موديل 2001 قير عادي

بعض المفاهيم ومعانيها لسهولة فهم الموضوع

خمسة و خطين: يوم شوكت الRPM تكون طايفة رقم 5 بخطين. و 5 تساوي 5000 دورة في الدقيقة. كل خط في RPM الاستيشن يساوي 200 دورة في الدقيفة. يعني خمسة و خطين يساوي 5400 دورة في الدقيقة.
الاستيشن يتف على 5500, يعني انه الاستيشن يتف على خمسة و خطين و نص.
. يوم يكون الRPM على 5400(خمسة و خطين) في قير خمسة يكون شوكة عداد السرعة في الاستيشن 220 او اقل بشوي, يمكن 218.

توب سيكرت: جراج في مصفح متواضع في العاصمة بوظبي (محد يروح تفكيره بعيد و يتحسب اني اقصد Top Secret مال يبان )

الحفة تزيد الظغط و البوردنك يزيد كمية الهوا اليدخل من الانتيك وال والهوا الي يخرج من الاكزوست وال الى الهدرز.

التجارب كلها كانت على تواير ميجر Michlen LTX M/S و رنق و كالة
عسب ما ينقال عني كذاب لانه مااعتقد اي موتر هدرز فلتر يقطع في خمسة والموتر عليه تواير تسعمية لانه بيكون ماشي حول 250 km/h

بسم الله

انا حفيت 0.75 ملي من الهد و سويت بوردنج عند جراج توب سيكرت و ركبت ثروتل انفينتي, طبعا الحفة والبوردنج كلفتني 1800. هذا الجراج اشتغل لمدة سنة او اقل و بند و فتح مكانه محل المنيوم هههههههههه
هذا يدل انه الجراج ماكان ذاك الزود.

قبل ما ادخل موتري عنده كان على موتري راس هدرز و الدبة الوسطية والاخيرة و كالة, وكان عليه بعد فلتر مع الثلاجة. الموتر كان يجيب خمسة و خطين(5400 RPM) دوووم في الظهر والشارع فاظي ما فيه مواتر(جريب وايد من التفة لان الستيشن يتف على خمسة و خطين و شوي تحت الخط الثاني),فاليل كان خمسة يتف. طبعا يفرق المشي بين الليل والظهر وبين شارع فيه مواتر و بين شارع فاضي. اذا فاليل الموتر يسحب اسرع من الظهر, وبعد الموتر يسحب اسرع اذا جربت في شارع مزحوم من شارع فاضي ما فيه مواتر.

المهم سرت عند الجراج هذا وكنت متحمس و مجهز الكاش و عطيته الموتر. الي كان يالس في المكتب واحد اسمه هلال (الاخ هندي). قالي سوي حفه وبوردنج و ركب بلكات NGK Irreduim مع وايرات و ركب ثروتل و الموتر عندك بيقلع. طبعا خليته ياخذ قياس قبل مااوقف الموتر عنده و جربت من اول جسر في امصفح والموتر جاب خمسة و خطين عند اللفة اليسار القوية الي قبل جسر طريف بكيلو. ارتاح الريال للمشي و قالي انه بعد ما بيسويلي خلطته السحرية الموتر بيتف بسرعة. طبعا وقفت الموتر عنده و تميت رايح و راد على الجراج مدة اسبوع لين ماجهز الموتر. طلع الحساب كامل حول 4800 درهم (السعر وصل 4800 لانه غير الفلتر والثلاجة و ركب بيب ثلاث انش للفلتر و تشيك على الهد وميزانية والات, السعر كان حلو) . جراج توب سيكرت كان يحف و يسوي بوردنج في مخرطة في الشارجة.
بعد ما جهز الموتر و سواله عادونه تمرين شليت الاخ هلال وكان ولد عمي وياي. نزلت من الجسر الاول حق مصفح وجربت الموتر. تصدقون انه الموتر مب راضي يجيب اكثر من خمسة و خط .
انا تحطمت معنويا و سرت شيكت على هوا الي في التواير و غيرت زيت المكينه و جربت مرة ثانية والموتر مارضى يجيب اكثر من خمسة و خط.
شكرت ربي على انه على الاقل الموتر شغال

الحفة والبوردنق والثروتل ما فرق وياي في الخط ابدا وخرب من مشي الموتر بشي بسيط
بس اعتقد انه يمكن فرق في قير واحد واثنين و ثلاثة

المهم تم الموتر عليه الحفة والبوردنج لمدة ثلاث اشهور وبعدين بطلت الهد الي عندي وبادلة بهد وكالة مب محفوف ولا عليه بوردنق من السكراب.
الموتر زاد مشيه سي بسيط جدا بس على الاقل يوم بجرب مع مواتر ما بكذب عليهم و بقول انه موتري بس عليه ثروتل انفينتي و راس هدز و فلتر .

هذا الكلام قبل ستة لتسعة اشهر ما اذكر متى بظبط.

طبعا الحين عليه هدرز كامل بروجكت اكس استينلس استيل وجاب معاي على الجارمن 214-218 على تواير تسعمية. الحمدلله بعد ما ركبت الهدرز هذا و بطلت هدرز السويدي الفرق كان واضح. قبل كان يجيب على الجارمن 206-209 على تواير تسعمية.

طبعا هذي تجربتي الشخصية في الحفة و البوردنج

ارجو من اخواننا الكرام وضع تجاربهم الشخصية في الحفة والبوردنق.
هل فرق معاك او ما فرق؟؟
واذا فرق حط كيف كان الموتر مشيه قبل و كيف استوا مشيه بعد الحفة والبوردنق_(اذا عندك dyno sheet للموتر قبل و بعد الحفة حطه في موضوعك )؟
و طبعا عند اي مخرطه او جراج حفيت الهد وسويت بوردنق وكم كلفك؟

والسموحة على الاطالة